ئىلى ئوبلاستىدا «دىنىي رادىكاللىقنى تۈگىتىش» نامىدا دىنسىزلاشتۇرۇش تەربىيىسى كۈچەيتىلدى

مېھرىبان

ئۇيغۇر ئېلىدىكى ھۆكۈمەت دائىرىلىرى «دىنىي رادىكاللىق ئىدىيىسىگە زەربە بېرىش» نامىدا، يېزا، مەھەللىلەردە ئاياللار ۋە ياشلارنى يىغىۋېلىپ ھەر خىل ناملاردىكى دىنسىزلاشتۇرۇش كۇرسلىرى ۋە ئاتالمىش «مەدەنىيەت – سەنئەت پائالىيەتلىرى»نى ئۇيۇشتۇرماقتا.

ئىلى ئوبلاستلىق ھۆكۈمەت تورىنىڭ 11 – يانۋاردىكى خەۋىرىدىن مەلۇم بولۇشىچە، بۇلتۇردىن بۇيان ئىلى ئوبلاستىدىكى قورغاس، چاپچال، غۇلجا ناھىيىسى، نىلقا، تېكەس قاتارلىق سەككىز ناھىيە ۋە غۇلجا شەھىرىدە «دىنىي رادىكاللىققا زەربە بېرىپ، مەدەنىيلىشىش» نامىدا ناخشا – ئۇسۇل مۇسابىقىلىرى ئۆتكۈزۈش، زامانىۋى كىيم مودىللىرى مۇسابىقىسى ئۇيۇشتۇرۇش، پەننى تەشۋىق قىلىش كۇرسلىرى ئېچىش نامىدا «دىننى سۇسلاشتۇرۇش» پائالىيەتلىرى ئېلىپ بېرىلغان.

خەۋەردە دېيىلىشىچە، 11 – يانۋار غۇلجا شەھىرىدە ئېچىلغان «دىنىي رادىكاللىق ئىدىيىسىگە زەربە بېرىش خۇلاسە يىغىنى» دا، ئوبلاستلىق پارتكومنىڭ سېكرىتارى خۇاڭ سەنپىڭ سۆز قىلىپ، «پەقەت غۇلجا ناھىيىسىدىلا 2014 – يىلى 4000 نەپەر ياش بىرقانچە قارارغا بۆلۈپ يىغىۋېلىنغان ۋە ئۇلارغا دىنىي ئاشقۇنلۇق ئىدىيىسىنى تازىلاپ، پەن – مەدەنىيەتكە يېتەكلەش تەربىيىسى مۇۋەپپەقىيەتلىك ئېلىپ بېرىلغان» لىقىنى تەكىتلىگەن.